Rev 15 | KYG | STEP | Agete'nae'mo agovana mago'e aune kavafe'mo lusi kava hu'a hapau ne'aiya agufa aune kava'mo hane'niyana seveni'a enisole vaya'mogi seveni'a kayo'mo ali'nae. Ani kayo'mo Goti'a aipamo leno ne'apateyanageno apamagisigeno hano hugiya'mofe'mo henaga'amo ani kayo'mo afole aisiyafe'mo hane'niye.

Revelation of John 15

Mago enisole vaya'mogi henaga'amo afole aisiya afinafe'mo kayo'mo ali'naya gemae

1 Agete'nae'mo agovana mago'e aune kavafe'mo lusi kava hu'a hapau ne'aiya agufa aune kava'mo hane'niyana seveni'a enisole vaya'mogi seveni'a kayo'mo ali'nae. Ani kayo'mo Goti'a aipamo leno ne'apateyanageno apamagisigeno hano hugiya'mofe'mo henaga'amo ani kayo'mo afole aisiyafe'mo hane'niye. 2 Agovana mago ani kotu'mo'a kalasigana huno aeno ha neleya ani kotute'mo atamo nelege'na age'nove. Ani ani kotu'mo agi'nale'mo mago vaya'mogimo afela afumo ae'a apakasege aune ya'mo ae'a agasege napa agi'amo ae'a agasege hu'a mai'naya vaya'mo he ti'a mai'nae. Goti'a mago alopa gitagana agufa ya'mo alino apami'nige'a ali'a amagi'nae. 3 Apakaemo Mosese'a Goti ali'ya'amo ne'aliya vekamo yokemo aikeli sipisipimo yoke'amo hu'nae. Ani yokemo hu'apae'mo,

Ala kava ne'mo kayamufa'age Gotigae, Mago'e kava'mo nehanage'apae'mo hapau ne'aiye. Apaote vaya'aite'mo yagaika ne'apatana ala kini ne'apimogae, nehana kavakamo kanale kava'age'mo hane'nigeka lama ge kava'mo nehane. 4 O Ala kava nene, hu'a, kagaikage'mo kaote vekamo mai'nana'mofe'mo ina lagimo kagaefe'mo koli osu'a kagikale'mo ali'a asaga osugae. Kagaemo anona'apilefe'mo alagepa huka alika fako huka apateteka ne'apamina kavakamo ago afole ai'niya'mofe'mo muki alu nofi vaya alu nofi vaya'mogimo e'a kaulagale'mo kagaefe'mo mono hugae,
hu'a hu'nae.

5 Hutage'nae'mo agovana koku'napi aote mono nopi'mo kita'amo aote aote huno yaki male'nige'apae'mo 6 seveni'a enisole vaya'mogimo seveni'a kayo'mo ali'naya vaya'mo aote mono nopati'mo emi e'nae. Alagepa kukenamo alave alave'age nehiya kukenamo vaili'naya vaya'mogimo hapaifi'yale'mo golileti'mo alo hu'naya kukenamo vaili'nae. 7 Mago vekamo lole'e lole'e vayapati vekamo'a seveni'a goli yuvapamo alino seveni'a enisole vaya'mo apami'niye. Goti'a maige maige huno mai'neno maino hano osuno ne'maiya Goti'a aipamo leno ne'apateya kava'mo yuvapafi'mo havaite'niye. 8 Goti'a ha le konali ya'a'e ayamufa'amo'e'mo ata legekana huno nelegeno halina'amo ailino aote mono nopi'mo haino havai te'nige'apae'mo muki vaya'amo afa'a fale'a hai'a maime maime o'u'nisage'apae'mo seveni'a enisole vaya'mogimo seveni'a kayoteti'mo apamagime apamagime u'a apamagi'a hano hutesage'apaeke'mo afa'a fale'a haigae.